وبعدين في اللي بيعِدوا
علينا الضحكة بالأجرة
وبعدين في اللي بيهدوا
قصور الحلم من بكرة
هزيل عايش على مبدأ
بحاول كل يوم أبدأ
أثور على كوكب الخندق
ولا بعرف بغير اني اطرح الفكرة
بحب الحَب في الأرض اللي منكوبة
زهقت الطل اشوف الطل كام طوبة
صحيح البنا يتمنى يلف البيت
لكنه الزيت مايتعباش في أنبوبة
وانا وحدي ولا وحدي بفوق وحدي
ده كام واحد بيتمني كمان وحده
يامعشر خير وشر بسجله وحدي
نعيش ازاي وكل مافينا بقى وحده
وفرقنا اللي بقى سيد عشان سيد بيتردد
يقول الكلمة في عيون اللي حارمينه
ومانعين انه يتمدد
ولا وجوب العلام فالح
يضاهي الجاهل الناجح
ولا صالح غلب طالح ولا الديانة بتهدد
بياخد القرض وشرط بإنه مايسدد
يدور التور في ساقية غلبه ويسلم
بواقي الحلم للديبة
ياخلق بتكره العيبة
وتعشق شبهة الطيبة
محلك سِر دي مصيبة بقينا بنتضرب جمعا ولابنصرخ ولا حتى بنتألم
ضمير الأبلة فات كله
وساب من شَعرته ذُله
أكيد الكل لم ضَله ولكن تِعبت الأبطال
أكيد اليأس لم طالهم ولكن شدة الغربال
دي كوم غِربان بيهدوا القتة للأُمرا
عليم الله وبكرة ينقضي أمرا
هاتتعدل وتتبدل أكيد البيضا بالسمرة
يا أمة هاتنطلق جمرة
فكونوا على الصراط واحد
وخلوا أملكوا في الواحد
حزين ياللي بتتمنى رضا واحد
مالوش مِلة
تبيع ماتبيع دي خِلة هاتنتهي بخَلة
صحيح العِزة مُحتلة
لكني بشوف
وشايف في التاريخ سُلة
تاتار وهاموش
وراحوا فاشوش ورحلوا فاشوش
هاتُمحى وشوش وتيجي وشوش
ياريتكم تقروا ( مانديلا )
ومانديله اللي كان بلَّة
لريق العاشق المغلوب
يارب نتوب عن الذَلة
يارب نحاسب الشِلة
يارب مانتحسب شَلّة ونتاخد بقوم فاطرين
يارب إحسبنا م الصايمين
ولا تحسِبنا م الضالة
__________________ـ_
✍️ موسى كامل موسى الدروي
