أديني بارسِمِك وردة
على الحيطة اللي قدَّامي
وباكتب إسمِك السَّامي
بنبض القلب م الآخر
وكنتِ الوقت…كنتِ الحلم
كنتِ برااااح مالوش آخر
وكان بيننا الزَّمن بيفوت نسيم هفهاف
وكنت باخاف
يكون إحساسنا مش هوَّه
ولا فارق معاكِ وجودي من عدَمُه
وكنت باكدِّب اللحظة
لكني ف آخر المشوار
لقيتني جوَّه وهم كبير مالوش أسوار
وانا تايه
ألملم فرحتي م الحيط ومن قلبي
وإن وجودي مش فارق ولا حبي
رجعت
وبارسمِك وردة على الحيطة اللي قدَّامي
واقول باي باي لأحلامي
