بقلم : موسى كامل موسى
ياما قالوا كل عشاق الغرام
ملايين قصايد من كلام
وياما برضه قلت ياما من قصايد
إلا حُبك
لسة مالقتلوش كلام
يوصف الوصف التمام
لسة مالقيتش البداية
لسة مش عارف أصوغنا أو أرتبنا في حكاية
لسة مش عارف شبيه يشبه ملامحك
نور يضاهي طعم صُبحك
صدقيني لما اصارحك
إني شايفك زي أية
كل يوم ممكن افسر فيكي حرف بدون كفاية
ياللي بتشمس بودِك
زار بياض التلج خدك
نام سواد الليل في شعرك
بان خضار الكون في نِنك
عاج في سِنك نور وصاية
انتي نور نور حياتي
حب ماجبتهوش رواية
حب غطسان في المراية بس ظاهر ليا سهوة
جوة روحي ليكي زهوة
غير وجودك جد ما اهوى
عمري ماشربتك ياقهوة إلا لما عرفتك انتي
ما انتي إنتي بدون مبالغة
بدون ما اجمل في الحلاوة
بدون ما ازود في ابتسامتي كل ما اتهجى في عيونك
ياحبيبتي كوني كونك
بعشقك عشق انطواني قبل ما الأيام تكونك
نوري شمسك وكونك
قربيني من رموشك
ريحي القلب بسلام
عرفي الناس باليمام
يالمغامرة والسلام
بيكي بكتب 100 قصيدة
ومهما قلت انا برضه عارف
لسة مالقيتش الكلام
ـــــــــــــــــــــــــــــــ
